auctore Georgio Acacio Enenckel L.Barone Hoheneccio
Argentorati MDCXIV

5

Annuae inter Lacedaemonios Atheniensesque indutiae finitae. Delios Athenienses ex insula eiecerunt. Cleon Atheniensis dux Toronam Galepsumque capit, ad Amphipolin ab Brasida proelio devincitur, in eo utroque dux cecidit. Post haec fessi utrimque cladibus Lacedaemonii et Athenienses pacem fecerunt. Quam cum sociorum quidam approbare nollent, seorsum Lacedaemonii cum Atheniensibus societatem pacti sunt. Contra Corinthii et Mantinei et Elei et Chalcidenses cum Argivis foedus ineunt. Scionen Athenienses capiunt. Interim dissensione inter Lacedaemonios Atheniensesque renata, cum Lacedaemonii quaedam loca ex foedere non restituissent, Boeotas contra pacta in societatem recepissent, irati ob id Athenienses cum Argivis et Mantineis Eleisque foedus iungunt. Hi sociis Epidauriis bellum faciunt, Orchomenum capiunt, Tegeam oppugnant. Eo moti Lacedaemonii exercitu educto Argivos sociosque ad Mantineam magna pugna devicerunt. Argivos ad pacem societatemque faciendam adegerunt, nec multo post destructa potentia populi optimatibus rem publicam subiecerunt. mox vi pulsis his plebs ad Atheniensium societatem revertit. Melum Athenienses obsessam expugnaverunt.